CHAMA cha Demokrasia na Maendeleo (CHADEMA), kimeamua kuwazika watu wawili kati ya watatu waliokufa kwa kupigwa risasi wakati polisi walipokuwa wakijaribu kutawanya umati wa wafuasi wa chama hicho wiki iliyopita.
Chadema inaandaa shughuli za kutoa heshima za mwisho katika uwanja wa NMC keshokutwa, uwanja ambao ulitumiwa na chama hicho kwa ajili ya mkutano wake wa hadhara siku kulipotokea machafuko, Januari 5 mwaka huu.
Katika uwanja huo ndipo walipokubaliana kukutana baada ya maandamano yaliyokataliwa na Polisi na ndipo Katibu Mkuu wa Chadema, Willibrod Slaa aliposhawishi wananchi kwenda kuvamia kituo cha Polisi, ili kuwatoa kwa nguvu baadhi ya viongozi wa chama hicho waliokuwa wakihojiwa.
Viongozi hao ni pamoja na mke wa Dk. Slaa, Josephine Mushumbusi, Mwenyekiti wa chama hicho, Freeman Mbowe, Mbunge wa Rombo, Sebastian Selasini, Mbunge wa Viti Maalumu, Lucy Luwenya na Mbunge wa Arusha Mjini Godbless Lema.
Kwa mujibu wa Mwenyekiti wa Chadema wa Wilaya ya Arusha, Derick Magoma, gharama za maziko hayo ikiwa ni pamoja na jeneza, sanda na mahitaji mengine yote muhimu vitabebwa na chama hicho.
Magoma alisema jana mjini hapa kuwa viongozi wa juu wa Chadema wakiongozwa na Mwenyekiti wa chama hicho, Freeman Mbowe wameshakwenda nyumbani kwa marehemu na kueleza azma ya chama hicho kugharimia kila kitu katika msiba huo.
Maiti za wafuasi hao, Denis Mtui atakayezikwa Rombo mkoani Kilimanjaro na George Waitara atakayezikwa Usa River, watabebwa katika majeneza na magari yaliyopambwa kwa bendera za chama hicho na kwenda katika uwanja huo tayari kwa ajili ya utoaji wa heshima za mwisho.
Mwenyekiti huyo aliwataka wananchi wa Mkoa wa Arusha na mikoa ya jirani kuja siku hiyo kuomboleza na kuaga miili hiyo na kufafanua kuwa utaratibu unaandaliwa kuishirikisha Polisi.
Baada ya kumalizika shughuli ya kuaga maiti hao, Magoma alisema kutakuwa na msafara wa magari kwenda nyumbani kwao kwa ajili ya maziko. Kuhusu mwili wa Poul Kahele, raia wa Kenya mwenye kitambulisho cha uraia namba 25066938, Magoma alisema utaratibu unaandaliwa na uongozi wa juu wa chama kuangalia namna maiti huyo atakavyosafirishwa kwenda nchini kwao.
Naye Frank Leonard, anaripoti kutoka Iringa kwamba wabunge wa chama hicho wamepanga kufanya maandamano kulaani hatua zilizochukuliwa na vyombo vya dola mkoani Arusha wakati wa kutawanya maandamano ya chama hicho.
Wakizungumza na waandishi wa habari jana mjini hapa, wabunge hao Mchungaji Peter Msigwa (Iringa Mjini) na Chiku Abwao (Viti Maalumu mkoa wa Iringa), walisema watapeleka taarifa Polisi na kama itakataliwa wametishia kufanya maandamano hayo kwa lazima.
Akizungumzia matukio hayo ya Arusha, Mchungaji Msigwa alisema yanakiuka kwa makusudi haki za binadamu na uvunjifu wa demokrasia ndani ya nchi.
Aliwataka wakazi wa Mkoa wa Iringa kujitokeza kutoa michango itakayowezesha majeruhi wa maandamano hayo kupata matibabu ya uhakika.
Alisema michango hiyo inaweza kupitia moja kwa moja katika Ofisi ya Mbunge mjini Iringa na itawasilishwa kwa wahusika kwa uwazi ili iwasaidie.
Alisema wabunge wote wa Chadema wanaendelea na michango yao na mpaka jana zaidi ya Sh milioni sita zilikuwa zimepatikana.
Tayari Serikali kupitia Waziri wa Mambo ya Ndani, Shamsi Vuai Nahodha, imetangaza nia ya kutafuta mpatanishi ili kukutanisha makundi hasimu na kurejesha amani na mshikamano mkoani Arusha.
